Të paktën një person ka humbur jetën dhe disa të tjerë janë plagosur të enjten pas një shpërthimi në një kantier në portin e Roterdamit në Holandë, sipas mediave vendase.
Sipas raportimit të transmetuesit holandez NOS, shpërthimi u regjistrua pak pas mesditës në një kompani të vendosur në Moezelweg, në zonën e Europoort, që është pjesë e portit të Roterdamit.
Policia ka bërë të ditur se të paktën një person ka gjetur vdekjen, ndërsa disa persona të tjerë janë lënduar si pasojë e këtij incidenti.
Më herët gjatë ditës, operatori i rrjetit “Stedin” kishte raportuar se në të njëjtën zonë ishte shënuar një ndërprerje e energjisë, ndërkohë që një stacion transformatorësh ishte përfshirë përkohësisht nga flakët, të cilat dyshohet se ishin pasojë e një rritjeje të tensionit elektrik.
Ndërkohë, policia bëri të ditur se shkaku i shpërthimit mbetet ende i paqartë dhe po hetohet.
