Dhjetra banorë u mblodhën në fshatin Goraj Budishtë në Malësinë e Madhe duke përuruar përfundimin e punimeve të kompanjelit dhe komonës së kishës atje.
Famullitari i Kastratit Padër Gazmend Tinaj kremtoi meshën e shenjtë duke dhënë disa mesazhe për besimtarët e pranishëm.
Gjatë predikimit, famullitari Tinaj tha se komona e re e vendosur në kompanjel është një thirrje për të gjithë besimtarët katolik që të shkojnë në meshë dhe të mos e braktisin kishën dhe besimin.
Në fund, kleriku që kremtoi këtë meshë të shenjtë falenderoi dy kontributorët kryesor Salvator Spathari, emigrant në Kanada dhe Aleks Mreshaj, emigrant në SHBA, të cilët financuan kompanjelin dhe komonën si dhe më herët edhe shtatoren e Zojës në oborrin e kësaj kishe me shpresën që emigrantët të mos e harrojnë vendlindjen e tyre.
Pas meshës së shenjtë, aktiviteti vijoi me një festë ku banorë të Goraj Budishtë dhe emigrant të ardhur për pushime qëndruan disa orë me njëri-tjetrin.
