Pas njoftimit nga Policia Rrugore dhe kërkesës për një ndërhyrje urgjente nga Prefektura e Qarkut Lezhë, Autoriteti Rrugor Shqiptar (ARRSH) ka filluar riparimet në Urën e Dajçit, e cila ndodhet në aksin Lezhë–Shkodër.
Ndërhyrjet e para kanë startuar rreth mesnatës së kaluar, me ekipet e punës që kanë nisur riparimin e pjesës së dëmtuar në pikën ku ura bashkohet me rrugën. Mungesa e elementëve metalikë kishte krijuar një kanal të rrezikshëm për qarkullimin e mjetëve.
Gjatë dy ditëve të fundit, ky segment ka shkaktuar shqetësime për drejtuesit e automjeteve, duke rezultuar në çarje gomash dhe dëmtime të ndryshme në mjetet e tyre. Në vendngjarje, Policia Rrugore ka qenë e pranishme për të sinjalizuar rrezikun dhe për të udhëhequr qarkullimin.
