Pas periudhave të tensionuara midis futbollistëve dhe federatës, Kosova shfaqet me një zhvillim të ri në prag të ndeshjeve të Ligës së Kombeve, duke publikuar listën e lojtarëve të zgjedhur nga trajneri Franko Foda.
Në mesin e 27 futbollistëve të përzgjedhur bie në sy përfshirja e Erblin Osmanit, një talent 17-vjeçar që aktivizohet me Bayern Munich.
Mesfushori i ri, i cili më herët ka qenë pjesë e përfaqësueseve të moshave të Gjermanisë, ka vendosur t’i bashkohet ekipit të Kosovës dhe do të jetë në dispozicion të “Dardanëve” duke nisur nga ndeshjet e ardhshme.
Kjo përfaqëson një përforcim të rëndësishëm për Kosovën, që do të përfitojë nga aftësitë e një lojtari të talentuar.
Osmani i bashkohet futbollistëve të tjerë që kanë ndjekur të njëjtën rrugë, si Albian Hajdari, Leon Avduhallu dhe Fisnik Asllani, të cilët vijnë nga Bundesliga.
Listës së re të Fodës i shtohen edhe emrat e Dion Kaçurit dhe Milot Avdylit, ndërkohë që mes të grumbulluarve janë të pranishëm të gjithë emrat kryesorë: Milot Rashica, Edon Zhegrova dhe Vedat Muriqi.
Ndeshjen e parë në Ligën e Kombeve, Kosova do ta luajë më 24 shtator në stadiumin “Vadil Vokrri” të Prishtinës kundër Irlandës. Pas saj, “Dardanët” do të zhvillojnë edhe tre sfida të tjera deri më 4 tetor: kundër Austrisë dhe Izraelit në transfertë, si dhe sërish ndaj Austrisë në ndeshjen e kthimit në shtëpi.
