Në protestën e 31-të para Kryeministrisë, mjeku Ilir Allkja mbajti një fjalim të fortë, ku kritikoi ashpër premtimet e pambajtura të qeverisë së Edi Ramës dhe kërkoi largimin e tij nga pushteti.
Fillimisht, Allkja u fokusua te patronazhistët, duke e akuzuar kryeministrin për gjuhën e papërshtatshme që përdor ndaj qytetarëve.
“Përshëndes patronazhistët dhe spiunët që nuk na janë ndarë asnjë ditë. Jemi në këtë shesh edhe për dinjitetin tuaj, sepse në Shqipërinë e lirë do të jetoni me dinjitet dhe jo duke spiunuar njerëzit e punës. Sot Rama e shthuri gjuhën dhe u bë mashkulli më i padenjë që ka qenë ndonjëherë në karrigen e kryeministrit. Unë jam sovrani dhe kam të drejtë t’i kërkoj llogari Edi Ramës“, tha Allkja.
Për më tepër, mjeku listoi një sërë premtimesh elektorale nga qeveria, duke e akuzuar Ramën për dështimin në disa nga sektorët më kritikë.
“Premtove shëndetësi falas dhe sot shqiptarët paguajnë 60 për qind të shpenzimeve shëndetësore nga xhepi i tyre. Premtove ujë 24 orë, por shumica e qyteteve ende nuk kanë furnizim të pandërprerë. Çfarë bëre në katër mandate? Blejmë ushqimet më shtrenjtë se të gjithë. Premtove rilindje në arsim, por mjafton të shohësh rezultatet e testit PISA. Premtove mbrojtjen e territorit dhe sot e ke dhënë nga veriu në jug“, deklaroi ai.
Fjalimi i Allkjas u pasua nga duartrokitjet e protestuesve të pranishëm, të cilët vazhduan të thërrisnin “Rama ik”, “Rama në burg, Berisha në burg”, “Shqipëri e re” dhe “Ju erdhi fundi”.
