Mjete të kompanisë private që vepron në sektorin e guroreve në Mamurras janë përfshirë për të dytën herë brenda pak javësh nga flakët në rrethana ende të paqarta. Incidenti më i fundit ndodhi mbrëmjen e së mërkurës, kur zjarri përfshiu disa ekskavatorë dhe pajisje të tjera të rënda, duke shkaktuar dëme të konsiderueshme materiale. Sipas informacioneve fillestare, dyshohet se zjarri mund të jetë shkaktuar qëllimisht. Kompania i përket shtetases me inicialet R.K., dhe ky është rasti i dytë brenda një kohe të shkurtër ku kjo kompani bëhet shënjestër e një ngjarjeje të tillë.
Edhe gjatë incidentit të mëparshëm, dyshimet e para ishin për zjarrvënie të qëllimshme, por autorët mbeten ende të paidentifikuar dhe ngjarja nuk ka gjetur ende zgjidhje. Rasti i fundit është raportuar menjëherë pranë autoriteteve, teksa grupi hetimor ka nisur punën për të zbardhur të gjithë dinamikën. Hetuesit po shqyrtojnë mundësitë e ndryshme të shkakut të zjarrit, duke mos përjashtuar as variantin që ky të jetë një veprim i qëllimshëm.
Fakti që ngjarja përsëritet ndaj të njëjtës kompani ka shtuar më tej dyshimet se mund të kemi të bëjmë me sulme të organizuara, ndërsa rezultatet e hetimeve pritet të hedhin dritë mbi identitetin e autorëve dhe motivet që qëndrojnë pas këtyre akteve.
