Ky botim është realizuar nga Botimet Fishta dhe përgatitur me një parathënie nga studiuesi Ardian Ndreca.
Në fjalën e tij gjatë promovimit, Ndreca e karakterizoi këtë vepër si një panoramë të gjerë të ideve, aktiviteteve dhe shpirtit të Koliqit gjatë një periudhe afër dy dekadash. Ai theksoi se shkrimet e përfshira në këtë vëllim dëshmojnë për një intelektual që, edhe në mërgim, mbeti i angazhuar thellësisht me atdheun, kulturën shqiptare dhe zhvillimet e kohës.
“Publicistika e Koliqit pasqyron brengat, idealet dhe vizionin e tij për të ardhmen e shqiptarëve, duke ofruar një dëshmi të vyer të mendimit intelektual shqiptar në shekullin XX”, u shpreh Ndreca.
Ai gjithashtu theksoi se ky botim nxjerr në pah dimensionin publicistik të autorit, si dhe anët e tij njerëzore, kulturore dhe kombëtare, duke ofruar lexuesve mundësinë e njohjes më të thellë me një nga figurat më të njohura të kulturës shqiptare.
Po ashtu, shkrimtari dhe publicisti Frano Kulli e vlerësoi këtë botim si një ngjarje të rëndësishme kulturore, pasi publicistika e Ernest Koliqit po botohet për herë të parë e mbledhur dhe e plotë në një vëllim të vetëm.
Sipas Kullit, libri përfaqëson një pasuri të vyer dokumentar dhe letrar, duke ofruar studiuesve, studentëve dhe lexuesve një qasje më të plotë ndaj veprës dhe trashëgimisë intelektuale të Koliqit.
Promovimi grumbulloi studiues, intelektualë, dashamirës të librit dhe qytetarë të interesuar për figurën e Ernest Koliqit, duke e bërë këtë aktivitet një rast të veçantë për rivlerësimin e trashëgimisë së një prej emrave më të shquar të kulturës shqiptare.
