Ekspertët e Ministrisë së Mbrojtjes kanë marrë vendimin për të pezulluar operacionin e kërkimit të personit të raportuar të zhdukur.
Ky vendim u mor për shkak të rrezikut të lartë që paraqet vetë ndërtesa.
Një shpërthim i fuqishëm në një pallat pesëkatësh në Elbasan ka shkaktuar dëme serioze në strukturën e godinës. Informacionet e deritanishme flasin për një viktimë, ndërkohë që një i moshuar vazhdon të rezultojë i zhdukur.
Një prej banorëve të ndërtesës, e cila u dëmtua rëndë nga shpërthimi, ka përshkruar më herët momentet dramatike që përjetoi me familjen. Ai tregoi se një pjesë e strukturës së pallatit u shemb, duke i bllokuar rrugën e daljes nga banesa.
Mes shqetësimit dhe dëshpërimit, banori rrëfen se gjatë shpërthimit dera e ballkonit e goditi në kokë dhe dëgjoi të birin të kërkonte ndihmë, por nuk kishte mundësi t’i afrohej.
Sipas tij, forca e shpërthimit ishte aq e madhe sa pjesë të soletës u rrëzuan mbi katin ku ndodhej familja, duke bllokuar plotësisht derën dhe pamundësuar daljen nga banesa.
“Më ra dera e ballkonit në kokë. Dëgjova tim bir të bërtiste ‘O ba, të lutem më ndihmo!’ dhe të mos kishe mundësi ta ndihmoje. U hodha nga kati i dytë. Nuk di asgjë çfarë ka ndodhur, sepse të gjithë në atë moment shihnin punën e vet. Vetëm di që dola në ballkon dhe thirra ‘Merrni zjarrfikësit’”, ka rrëfyer ai.