Task-Forca e Administratës Tatimore ka zhvilluar kontrolle të intensifikuara në Shkodër, në kuadër të planit operacional për sezonin turistik, me fokus te respektimi i detyrimeve fiskale dhe formalizimi i bizneseve.
Nga 23 verifikime të kryera, në 13 subjekte janë evidentuar shkelje administrative, ndërsa dy biznese që ushtronin aktivitet të paregjistruar janë bllokuar.
Gjatë kontrolleve janë konstatuar dy raste të tregtimit të mallrave pa faturë, dy raste të mungesës së autofaturës, gjashtë raste të moslëshimit të faturës, si dhe një rast i mospajisjes me certifikatë elektronike.
Administrata Tatimore paralajmëron se kontrollet do të vijojnë përgjatë gjithë sezonit turistik, ndërsa u kërkon qytetarëve të raportojnë rastet e shkeljeve përmes aplikacionit “Denonco Evazionin” dhe të kërkojnë faturë për çdo produkt apo shërbim të blerë.
