Sot, një incident i rëndë ka ndodhur me urdhër të shefit të Komisariatit nr. 1, Ervin Hasrama.
Gazetarja Vjolanda Peca u ndalua dhe u mbajt për më shumë se dy orë brenda Komisariatit nr. 1, teksa raportonte mbi protestën e zhvilluar përpara Kuvendit.
Kjo ngjarje ka shkaktuar reagime të ashpra, duke u cilësuar si një cenim serioz i lirisë së medias dhe i të drejtave të gazetarëve për të ushtruar profesionin e tyre.
Shoqërimi i gazetares, pavarësisht vullnetit të saj, dhe mbajtja në komisariat janë dënuar si të papranueshme, me theksimin se gazetarët gëzojnë të drejtën kushtetuese për të raportuar mbi çështje me interes publik, pa u penguar, intimiduar apo vendosur nën presion.
Pas më shumë se dy orësh, Peca u lirua.
Ngjarja ka nxitur një reagim edhe nga Asociacioni i Gazetarëve të Shqipërisë, i cili shprehu shqetësim për shoqërimin e gazetares, duke e konsideruar ndërhyrje të rëndë në lirinë e medias. Organizata bëri thirrje autoriteteve të sigurojnë mundësinë e ushtrimit të lirë të profesionit të gazetarit dhe të evitojnë çdo lloj pengese apo presioni gjatë raportimit të ngjarjeve me interes publik.
