Deputetja e pavarur, Marjana Koçeku ka reaguar për situatën e zjarreve që kanë përfshirë zona të ndryshme të vendit, duke ngritur shqetësimin për dëmet e mëdha që po i shkaktohen natyrës dhe parqeve.
“Lura, Kruja, Mallakastra, Fushë-Arrëzi, Orenja… Zjarret e kanë mbërthy këtë vend, prej jugut në veri”, shkruan Koçeku.
Ajo thekson se, pavarësisht nëse zjarret janë të qëllimshme apo të paqëllimshme, përgjegjësia kryesore duhet të jetë parandalimi dhe mbrojtja e pasurisë natyrore.
Sipas saj, një shtet serioz duhet ta konsiderojë mbrojtjen nga zjarret si çështje sigurie, që kërkon planifikim, mjete, parapërgatitje dhe ndërgjegjësim gjatë gjithë vitit, dhe jo ndërhyrje vetëm në momentin e fundit.
Koçeku e lidh situatën edhe me politikat e qeverisë, duke ironizuar me “Paketën e Maleve”.
“Por me sa duket, prioriteti i këtij shteti ka qenë ma tepër Paketa e Maleve, sesa mbrojtja e vetë Maleve”, shprehet ajo.
Në fund, deputetja paralajmëron se, sipas saj, nëse vazhdohet me këto prioritete, rrezikohet jo vetëm natyra, por edhe pasuria më e madhe e vendit: mjedisi dhe demokracia.
