Shëndetësia në Shqipëri po rëndon jo vetëm për shkak të sëmundjeve, por edhe për shkak të kostos që familjet duhet të përballojnë vetë.
Sipas shifrave të publikuara nga Kliti Hoti, rreth 2 mijë pacientë vuajnë nga tumori i mushkërisë, por ilaçet rimbursohen vetëm për rreth 430 prej tyre. Pra, vetëm rreth 1 në 5 pacientë përfshihet në skemën e rimbursimit.
Situata paraqitet e ngjashme edhe për sëmundjet kronike. Nga rreth 261,500 të rritur me diabet, rreth 101,500 përfitojnë rimbursim, ndërsa mbi 160 mijë duhet t’i sigurojnë vetë medikamentet.
Edhe për hipertensionin, nga rreth 760 mijë të rritur të prekur, vetëm rreth 244 mijë përfitojnë nga skema, duke lënë mbi 500 mijë pacientë jashtë saj.
Vetëm për diabetin dhe hipertensionin, sipas këtyre të dhënave, familjet shqiptare shpenzojnë rreth 50 milionë euro në vit nga xhepi.
“Në një kohë kur dëgjojmë të flitet për shëndetësi falas, pyetja mbetet: falas për kë?”- ironizon Hoti.
Shqipëria shpenzon rreth 330 euro për banor për shëndetësinë, ndërsa shpenzimet publike për këtë sektor zënë rreth 2.9% të PBB-së, një nivel dukshëm më i ulët krahasuar me vendet europiane.
Me rritjen e numrit të të sëmurëve dhe plakjen e popullsisë, nevoja për trajtime dhe medikamente shtohet. Ndërkohë, financimi publik për shëndetësinë mbetet një nga pikat më të debatueshme.
Në fund ai Hoti shton: Nëse shëndetësia është publike, pse një pjesë kaq e madhe e kostos së saj vazhdon të paguhet nga xhepi i qytetarëve?
