Jola Hysaj ka dalë me një deklaratë publike pas emërimit si drejtuese e Agjencisë Kombëtare të Turizmit. Ajo ka konfirmuar pranimin e postit dhe ka adresuar reagimet dhe pyetjet e shumta që ka marrë në rrjetet sociale. Me anë të një postimi në mediat sociale, Hysaj ka shprehur falënderimin për besimin e treguar ndaj saj, duke nënvizuar se do të përpiqet ta justifikojë me punë. “Po, jam emëruar drejtoreshë e Agjencisë Kombëtare të Turizmit. Jam shumë falënderuese për besimin dhe uroj ta justifikoj plotësisht”, shkruan ajo.
Ish-funksionarja e Partisë Demokratike për Marrëdhëniet me Publikun, ka pohuar gjithashtu se ka zhvilluar një takim me kryeministrin Edi Rama, duke ndarë edhe mesazhin që ka marrë nga ai. “Po e kam takuar Edi Ramën. Fjala që më mbeti në mend ishte: ‘Nuk dua të bëhesh socialiste, dua të çosh më lart institucionin që ngriti Zana Çela’”, shkruan Hysaj.
Hysaj ka theksuar se orientimi i saj politik mbetet i njëjtë, por ka sqaruar se nuk është më pjesë e Partisë Demokratike. “Po, jam demokrate, por nuk jam me Partinë Demokratike. Jam me partinë e Shqipërisë turistike”, shprehet ajo. Në përfundim të komunikimit të saj publik, Hysaj u ka kërkuar ndjekësve që të respektojnë vendimin e saj për të marrë drejtimin e një institucioni në një fushë ku, sipas saj, ka eksperiencë shumëvjeçare.
REAGIMI
Përshëndetje, meqë kam marrë shumë pyetje në whatsap nga miq ja përgjigja ime.
Po jam emëruar drejtore e Agjencisë Kombëtare të Turizmit. Jam shumë falenderuese për besimin dhe uroj ta justifikoj plotësisht.
Po e kam takuar Edi Ramën. Fjala që më mbeti në mend ishte: Nuk dua të bëhesh socialiste, dua të çosh më lart institucionin që ngriti Zana Çela.
Po jam demokrate, por nuk jam me Partinë Demokratike. Jam me partinë e Shqipërisë turistike.
Uroj të respektoni lirinë dhe zgjedhjen time për të bërë një punë të re në një sektor ku kam punuar shumë vite.
Gjithkush është i lirë të spekullojë dhe thurrë teori konspirative. Por kush më njeh e di që unë i pres drutë shkurt.
Kaq kisha nga ana ime. Kush do më urojë punë të mbarë e falenderoj! Kush do më shajë dhe mallkojë e ngushëlloj.
