Largimi i deputetes Marjana Koçeku nga Partia Socialiste dhe bashkimi i saj me protestën qytetare ka sjellë reagime edhe nga figura të njohura të së majtës. Mes tyre është edhe ish-ministri i Financave dhe ish-deputeti socialist, Arben Malaj, i cili ka shprehur publikisht mbështetjen për qëndrimin e saj.
Në një koment të publikuar në videon ku Koçeku njoftonte pjesëmarrjen në protestë, Malaj vlerëson integritetin e deputetes dhe e cilëson qëndrimin e saj si një shembull për të rinjtë. Ai thekson se parimi “partitë nuk duhet të vendosen kurrë mbi atdheun” është një standard që duhet të udhëheqë politikën.
Në të njëjtin reagim, ish-ministri drejton kritika të forta ndaj mënyrës së qeverisjes, duke përdorur termin “Mbretëria Kryeministrore”, të cilën e akuzon se ka dëmtuar ekonominë dhe politikën shqiptare në funksion të një pushteti të pakufizuar.
Reagimi i Malajt shihet si një sinjal mbështetjeje për zërat kritikë ndaj drejtimit aktual të Partisë Socialiste dhe vjen në një moment kur zhvillimet politike brenda së majtës po tërheqin vëmendje të madhe.
