Këshilltari i Partisë Demokratike në Këshillin Bashkiak të Shkodrës, Imeldi Sokoli, ka reaguar me ironi ndaj deklaratave të kryebashkiakut Benet Beci lidhur me përfshirjen e Liqenit të Shkodrës në UNESCO.
Përmes një postimi në rrjetet sociale, Sokoli shprehet se lajmi për UNESCO-n është pozitiv dhe një vlerësim për një nga pasuritë më të rëndësishme natyrore të vendit, por ngre pikëpyetje mbi qëndrimin e Bashkisë Shkodër ndaj zhvillimit urban pranë liqenit.
Sipas tij, është kontradiktore që nga njëra anë të promovohet mbrojtja dhe statusi natyror i Liqenit të Shkodrës, ndërsa nga ana tjetër të kërkohet miratimi i ndërtimeve të reja shumëkatëshe në zonën e Livadeve, pjesë e bregut lindor të liqenit, përmes rishikimit të Planit të Përgjithshëm Vendor.
“Jo për gjë, por të dyja nuk rrinë në një vend”, shkruan Sokoli, duke nënkuptuar se mbrojtja e vlerave natyrore dhe zhvillimi intensiv me ndërtime të larta janë dy qasje që bien ndesh me njëra-tjetrën.
Reagimi i këshilltarit demokrat vjen në një kohë kur debati mbi zhvillimin urban dhe ruajtjen e mjedisit në Shkodër vijon të mbetet një nga temat më të diskutuara në qytet.
