Ish-trajneri i ekipit olimpik irlandez të notit, George Gibney, është dënuar sot në Dublin me 15 vjet e gjashtë muaj burgim, në një rast që ka shkaktuar indinjatë të gjerë publike.
Prokuroria bëri me dije se Gibney kishte abuzuar seksualisht me katër vajza, të moshës nga 8 deri në 13 vjeç, gjatë periudhës së viteve 1970 dhe 1980. Pas ekstradimit nga Shtetet e Bashkuara vitin e kaluar, ai u shpall fajtor për 39 vepra penale të sulmit seksual dhe një akuzë për tentativë përdhunimi, të kryera mes viteve 1971 dhe 1981.
Gibney ka qenë trajner i ekipit irlandez të notit në Lojërat Olimpike të Seulit në 1988, ndërsa në vitin 1984 ka drejtuar notarë në Lojërat Olimpike të Los Anxhelosit. Në seancën gjyqësore, gjykatësi e karakterizoi 78-vjeçarin si një “manipulues” dhe theksoi se kishte shfrytëzuar autoritetin si trajner për të kryer sulme “sistematike”, duke demonstruar një sjellje “grabitqare seksuale”.
Gibney kreu abuzimet ndaj viktimave të tij – të gjithë në moshë nga tetë deri në trembëdhjetë vjeç – në vende të ndryshme. Këto përfshinin makinën e tij gjatë rrugës për në stërvitje dhe zyrën e tij, si dhe rastin e dy motrave të cilat ai i abuzoi në banesën e tij ndërsa ato kujdeseshin për fëmijët e tij.
Në vitin 1993, ndaj tij rëndonin 27 akuza për abuzim seksual ndaj fëmijëve, por ai i shmangu pasi gjykata vendosi se rastet ishin parashkruar. Për shumë vite, viktimat e George Gibney vazhduan përpjekjet për të siguruar drejtësi pasi ndjekja penale dështoi.
Një podcast i BBC-së i publikuar në vitin 2020 luajti rol në gjurmimin e tij në Florida, çka çoi në hapjen e akuzave të reja dhe shtyu policinë irlandeze të rihapte hetimet. Ai u ndalua përfundimisht në Shtetet e Bashkuara në vitin 2025, ku jetonte, dhe më vonë u ekstradua në Irlandë.
