Në Ditën Ndërkombëtare të Muzeve, në qytetin e Lezhës u inaugurua zyrtarisht Muzeu Arkeologjik i ndërtuar pranë Kalasë së Lezhës.
Lajmi u bë i ditur nga kryetari i bashkisë Lezhë, Pjerin Ndreu, i cili mori pjesë në ceremoninë e hapjes së bashku me ministrin e Turizmit, Kulturës dhe Sporteve, Blendi Gonxhja, drejtoreshën e përgjithshme të SASPAK, Eridana Çano, si dhe përfaqësuesen e Delegacionit të Bashkimit Europian në Shqipëri, Entela Sulka.
Sipas Ndreut, muzeu i ri i shtohet atraksioneve kulturore dhe turistike të qytetit, duke krijuar një tjetër pikë referimi për vizitorët vendas dhe të huaj.
Një nga elementët kryesorë të muzeut është edhe eksperienca virtuale që u ofrohet vizitorëve, përmes mundësisë për të vizituar virtualisht Odën e Zejtarisë në Gjakovë, në funksion të promovimit të trashëgimisë kulturore dhe lidhjes së saj përtej kufijve.
