Pep Guardiola nuk ka zgjedhur një kombëtare të veçantë për të mbështetur në Botërorin 2026, por trajneri spanjoll ka zbuluar se cilët elementë mund t’i japin Spanjës avantazhin në finalen ndaj Argjentinës.
Ish-trajneri i Manchester City-t, aktualisht pa skuadër pas një dekade të mbushur me suksese në Angli, ka dhënë një intervistë për “OKX”, ku ka folur për Botërorin, të ardhmen e tij dhe përballjen e madhe mes Spanjës dhe Argjentinës.
“Unë nuk mbështes një kombëtare të caktuar në këtë Botëror. Do të zgjedh lojtarët që më pëlqejnë. Kam luajtur me disa prej tyre dhe do të jem i lumtur t’i shoh duke luajtur mirë”, deklaroi Guardiola.
Trajneri 55-vjeçar shpjegoi se ka simpati për shumë futbollistë në skuadra të ndryshme.
“Nëse Argjentina fiton Botërorin, ka lojtarë që i njoh. E njëjta gjë vlen edhe për Francën. Ndërsa te Portugalia ka futbollistë, lidhja dhe bashkëpunimi i të cilëve më kanë impresionuar”, tha ai.
“Rodri dhe Lamine Yamal mund të vendosin finalen”
Duke folur për Spanjën e Luis de la Fuente, e cila do të përballet me Argjentinën në finalen e Botërorit, Guardiola theksoi dy emra që sipas tij mund të jenë vendimtarë.
“Nëse Rodri tregon nivelin e tij në mesfushë, së bashku me Pedrin, dhe nëse Lamine Yamal është në momentin e tij më të mirë, Spanja mund të bëjë diferencën”, u shpreh ai.
Guardiola foli edhe për talentin e Barcelonës, i cili pavarësisht disa problemeve fizike ka arritur të jetë protagonist.
“Lamine Yamal erdhi pak prapa në aspektin fizik për shkak të dëmtimeve të fundit. Megjithatë, duke parë moshën e tij, ai ka një aftësi të jashtëzakonshme për të përballuar presionin dhe është në gjendje të vendosë një ndeshje i vetëm”, tha trajneri spanjoll.
“Një ditë do të kthehem te Manchester City”
Guardiola foli edhe për të ardhmen e tij pas largimit nga Manchester City, duke lënë të hapur mundësinë e një rikthimi në klubin anglez.
“Fillova në moshën 37-vjeçare te Barcelona dhe tani jam 56. Kam nevojë të bëj gjëra të reja. Aktualisht jam shumë i lumtur”, deklaroi ai.
Megjithatë, ai nuk e përjashtoi një rikthim në “Etihad”.
“Një ditë, sigurisht që do të rikthehem në ‘Etihad Stadium’. Por tani dua të qëndroj pas skenës. Nëse do të më kenë nevojë, do të jem aty”, shtoi Guardiola.
Klopp, rivali më i madh i karrierës
Në fund, Guardiola kujtoi edhe rivalin më të madh të karrierës së tij: Jürgen Klopp.
“Jürgen ishte rivali më i madh i karrierës sime. Ky njeri ishte në gjendje të ndryshonte sistemin çdo 20 minuta. Më çmendte”, tha me buzëqeshje trajneri spanjoll.
Pavarësisht se nuk ka zgjedhur një skuadër për të mbështetur në finale, fjalët e Guardiolës tregojnë se ai sheh te Spanja një potencial të madh për të mposhtur Argjentinën, sidomos nëse ‘yjet’ e saj kryesorë arrijnë formën optimale.
