Një projekt i planifikuar në zemër të Gjuhadolit ka ngjallur shqetësim dhe debat në Shkodër. Përmes një statusi publik, Kliti Hoti ngre pikëpyetje mbi ndërhyrjet e Bashkisë Shkodër në një objekt historik dhe projektin e publikuar më pas për ndërtimin e një godine shumëkatëshe në këtë zonë.
Hoti kujton se rreth një muaj më parë, Bashkia ndërhyri në objektin historik, duke shembur pjesë të çatisë dhe mureve me argumentin se godina paraqiste rrezik për kalimtarët. Sipas tij, sot mbi të njëjtin objekt publikohet një projekt që parashikon një ndërhyrje të re ndërtimore në një prej zonave më të rëndësishme të Qendrës Historike të Shkodrës.
“Si është e mundur që një objekt historik, i cili deri dje paraqitej si rrezik për t’u ruajtur, sot të konsiderohet i përshtatshëm për një ndërhyrje që ndryshon rrënjësisht karakterin e tij?”, shkruan Hoti.
Ai ngre gjithashtu shqetësimin se projekti, sipas dokumenteve të publikuara, ka shkaktuar pikëpyetje edhe te specialistë të trashëgimisë kulturore.
Në reagimin e tij, Hoti e vendos çështjen në një plan më të gjerë, duke argumentuar se Qendra Historike e Shkodrës nuk mund të trajtohet si një parcelë e zakonshme ndërtimi.
“Gjuhadoli nuk është pronë e Benet Becit. Është trashëgimi e Shkodrës”, është mesazhi që përcjell Hoti, duke kritikuar mënyrën se si po trajtohet kjo zonë.
Në fund, ai thekson se historia e qytetit nuk nis dhe nuk përfundon me një kryetar bashkie, ndërsa mënyra se si do të trajtohet Gjuhadoli, sipas tij, do të jetë pjesë e vlerësimit që shkodranët do t’i bëjnë administratës vendore.
