Një gjykatë në Berlin ka vendosur të dënojë me burgim të përjetshëm një mjek gjerman, i angazhuar në kujdesin paliativ, pasi e shpalli atë fajtor për vrasjen e 15 pacientëve të tij.
Autoritetet kanë shprehur dyshime se numri i viktimave mund të jetë ndjeshëm më i madh dhe kanë nisur hetime për dhjetëra raste të tjera të ngjashme.
41-vjeçari, i njohur si Johannes M, u shpall fajtor për vrasjen e 12 grave dhe tre burrave në periudhën midis shtatorit 2021 dhe korrikut 2024.
Viktimat e tij ishin në moshë nga 25 deri në 94 vjeç. Gjatë procesit gjyqësor, u theksua se të gjithë ata ndodheshin në gjendje të rëndë shëndetësore, por nuk ishin në prag të vdekjes.
Sipas prokurorëve, mjeku në fjalë, gjatë vizitave në shtëpi, u jepte pacientëve një kombinim vdekjeprurës ilaçesh pa marrë lejen e tyre. Në disa raste, dyshohet se ai ka provuar të digjte banesat për të fshehur veprimtarinë e tij kriminale.
Në korrik 2024, pak para arrestimit të tij, prokurorët raportuan se mjeku kishte vrarë dy pacientë brenda të njëjtës ditë: një 75-vjeçar në apartamentin e tij në qendër të Berlinit dhe, disa orë më vonë, një grua 76-vjeçare në një lagje fqinje. Hetuesit raportuan se ai kishte tentuar të digjte shtëpinë e gruas, por kishte dështuar.
Gjatë një procesi gjyqësor që zgjati rreth një vit, mjeku nuk kishte bërë asnjë deklaratë, megjithatë muajin e kaluar ai pranoi se kishte “vrarë njerëz”, përcaktuar në referencë ndaj 12 pacientëve të tij të sëmurë rëndë.
Ai shpjegoi para gjykatës se ishte bindur se vepronte në mënyrë të duhur, duke menduar se po i shpëtonte ata nga “vuajtjet dhe mundimet”.
“Gjatë gjithë kësaj kohe, mendova se kjo ishte gjëja më e mirë për të gjithë,” tha ai, duke kërkuar gjithashtu falje për dhimbjen që kishte shkaktuar.
Autoritetet kanë shprehur dyshime se mjeku mund të ketë vrarë edhe pacientë të tjerë. Prokurorët aktualisht po shqyrtojnë edhe 76 raste të tjera.
Nëse këto akuza provohen dhe ai shpallet fajtor për këto raste, do të bëhet fjalë për një nga rastet më të rënda të vrasjeve seriale në historinë e Gjermanisë, sipas mediave vendase.
Vetë mjeku u shpreh në gjykatë se do të “përfshihej shumë më herët në procedurat e ardhshme” për të ndihmuar në përmirësimin e situatës.
Gjatë procesit, të afërmit e viktimave ndanë dëshmitë e tyre për dhimbjen e pësuar. Nëna e viktimës më të re, një 25-vjeçare që vdiq në vitin 2021, tha mes lotësh: “Ajo kurrë nuk tha se nuk donte të jetonte më.”
Gjithashtu, djali i një gruaje 72-vjeçare, e cila humbi jetën në vitin 2024, deklaroi se nëna e tij kishte planifikuar një udhëtim në Detin Baltik së bashku me motrën e saj. “Nëna ime donte të vazhdonte të jetonte,” shprehu ai.
Përveç dënimit të përjetshëm, gjykata urdhëroi mbajtjen e mjekut në paraburgim dhe i ndaloi përherë ushtrimin e profesionit të tij të mjekut.
