Dy nxënëse janë lënduar rëndë nga një 16-vjeçar që i sulmoi me thikë në oborrin e një kompleksi shkollor në Schongau, një qytet në jugperëndim të Mynihut, Gjermani.
Autori i këtij sulmi, i dyshuar gjithashtu për mbajtjen e një arme zjarri, është kapur nga policia. Vajzat e lënduara janë dërguar në spital dhe tani janë jashtë rrezikut për jetën.
Një prani e konsiderueshme e policisë dhe helikopterëve të reagimit të shpejtë shkuan në vendngjarje, pas informacioneve fillestare për të shtëna me armë dhe një numër të madh të lënduarve.
Ministri i Brendshëm i Bavarisë, Joachim Herrmann, njoftoi se autoritetet besojnë se sulmi është realizuar nga një individ dhe se nuk ka persona të tjerë të dyshuar.
“Ne besojmë se ka pasur një autor që mbante një thikë dhe një armë zjarri, dhe nuk kemi të dhëna për ndonjë të dyshuar tjetër. Aktualisht, nuk ka informacion të besueshëm mbi motivin e këtij sulmi”, tha Herrmann.
Sipas tij, dy vajzat janë rëndë të plagosura, por po marrin ndihmën mjekësore të nevojshme dhe janë jashtë rrezikut për jetën.
