Reparti i Urgjencës në Spitalin Rajonal të Shkodrës po përjeton një rritje të konsiderueshme në numrin e pacientëve që kërkojnë shërbim mjekësor. Sipas informacionit nga përgjegjësi i repartit, Ardian Dajti, në një periudhë 24-orëshe, regjistrohen deri në 135 vizita, një rritje e cila lidhet ngushtësisht me temperaturat e larta dhe shtimin e rasteve të sëmundjeve sezonale.
Dajti thekson se, përveç pacientëve me probleme të zakonshme, është vënë re një rritje e dukshme në numrin e atyre që paraqiten me çrregullime neurologjike, gjë që ka shtuar barrën mbi stafin mjekësor.
Rritja e vizitave është ndikuar gjithashtu nga rritja e aksidenteve, të cilat kërkojnë intervenime të menjëhershme nga ekipi i urgjencës.
Për të ndihmuar në menaxhimin e mbingarkesës dhe për të siguruar që rastet urgjente të trajtohen në kohë, shefi i Urgjencës iu bën thirrje qytetarëve që për probleme shëndetësore që nuk janë emergjente, të drejtohen te mjeku i familjes ose në Poliklinikën e qytetit.
Stafi i Urgjencës vazhdon të qëndrojë në gatishmëri për të përballuar fluksin e pacientëve, ndërsa autoritetet shëndetësore rekomandojnë që qytetarët të jenë të vëmendshëm gjatë ditëve me temperatura të larta dhe të shmangin ekspozimin e panevojshëm në diell gjatë orëve më të nxehta.
