Klubi i Vllaznisë ka marrë një tjetër goditje nga FIFA, e cila ka vendosur një bllokim të ri për merkaton e lojtarëve.
Ky vendim vjen si pasojë e çështjeve që lidhen me pagat e prapambetura të pretenduara nga ish-lojtarë të skuadrës. Vendimi i dytë negativ për shkodranët është regjistruar më 14 maj, duke iu shtuar sanksionit të parë të dhënë më 27 shkurt të këtij viti.
Për të zhbllokuar të drejtën e transferimeve, Vllaznia duhet të shlyejë plotësisht detyrimet financiare të të dyja dosjeve. Kjo situatë mund të krijojë vështirësi serioze në organizimin e skuadrës përpara pjesëmarrjes në kompeticionet europiane.
Paralelisht me problemet zyrtare, ekipi po kalon edhe një moment delikat në aspektin sportiv pas humbjes së fundit. Kuqeblutë u mposhtën me rezultatin 2-0 nga Dinamo në ndeshjen e zhvilluar në stadiumin “Air Albania”. Megjithëse e mbylli kampionatin e rregullt në vendin e parë me një pikë më shumë se Elbasani, formula e re rrezikon t’i heqë titullin.
