Fakulteti Ekonomik i Universitetit të Shkodrës “Luigj Gurakuqi” ka shënuar një nisje pozitive të procesit të regjistrimeve për vitin e ri akademik. Pas mbylljes së fazës së parë, më shumë se 70 për qind e kuotave të ofruara janë plotësuar.
Sipas drejtueses së fakultetit, interesi i maturantëve për programet ekonomike është rritur në krahasim me vitin e kaluar, duke i renditur këto degë ndër më të kërkuarat në universitet.
Në përpjekje për ta përshtatur ofertën universitare me nevojat e tregut të punës, këtë vit Fakulteti Ekonomik ka shtuar një program të ri Bachelor, “Business Administration”. Programi do të zhvillohet në gjuhën angleze dhe krahas studentëve shqiptarë synon të tërheqë edhe të rinj nga vende të tjera.
Fakulteti Ekonomik ka aktualisht rreth 1 mijë studentë aktivë në tre programet e studimit. Krahas programeve Bachelor, ofrohen edhe programe Master Shkencor dhe Profesional, ndërsa në fushën e Turizmit mundësohen edhe studimet e doktoraturës.
Interesi i lartë i regjistrimeve në fazën e parë pritet të ndiqet edhe nga fazat e ardhshme, teksa universitetet vijojnë procesin e regjistrimit të studentëve të rinj.
