Avionët luftarakë të NATO-s kanë rrëzuar një dron pasi ai hyri në hapësirën ajrore të Estonisë, tha sot ministri i Mbrojtjes, Hanno Pevkur. Ai shtoi se avioni besohet të ketë qenë një dron ukrainas që me sa duket kishte në shënjestër pozicionet ruse.
Fillimisht nuk pati raportime për lëndime ose dëme. Pevkur e përshkroi incidentin si të parin e këtij lloji. Sipas raportimeve, avionët luftarakë rumunë ”F-16” e rrëzuan dronin mbi liqenin Vortsjarv në Estoninë jugore. Droni besohet të jetë rrëzuar në një zonë kënetore, me kërkimet për rrënojat ende në vazhdim.
”Policia e Sigurisë e Estonisë po udhëheq hetimin”, tha Pevkur.
Gjeneralbrigade Riivo Valge tha se droni u gjurmua dhe u shkatërrua nga raketa e parë e qëlluar drejt tij. Estonia, një anëtare e NATO-s dhe BE-së, kufizohet me Rusinë në lindje.
Më parë, forcat e armatosura estoneze kishin paralajmëruar për një kërcënim të mundshëm në pjesën jugore të shtetit baltik. Në Letoninë fqinje, autoritetet lëshuan gjithashtu alarme në disa rajone pranë kufirit rus, pasi një dron besohej se kishte hyrë në hapësirën ajrore letoneze.
Fillimisht nuk ishte e qartë nëse ishte i njëjti avion që më vonë u rrëzua mbi Estoni.
Ministria e Jashtme e Ukrainës u kërkoi falje shteteve baltike për atë që e quajti “incidente të paqëllimshme”, duke sugjeruar se dronët mund të jenë devijuar nga sistemet ruse të bllokimit elektronik.
Estonia, Letonia dhe Lituania nuk operojnë avionët e tyre luftarakë. Që nga viti 2004, NATO ka mbrojtur hapësirën ajrore baltike përmes një misioni rrotullues të policimit ajror që përfshin avionë dhe personel aleatë të stacionuar në rajon
