Mbështetja financiare për fëmijët me aftësi të kufizuara në qarkun e Shkodrës do të dyfishohet, sipas ndryshimeve të fundit në skemën e mbrojtjes sociale.
Janë 432 fëmijë të moshës 0–18 vjeç në këtë qark që do të përfitojnë rritjen e pagesës mujore. Drejtorja Rajonale e Shërbimit Social Shkodër, Alma Mehmetaj, njoftoi se masa e shtuar e mbështetjes do të aplikohet për të gjitha kategoritë e personave me aftësi të kufizuara – përfshirë ata që janë vlerësuar sipas modelit bio-psiko-social, personat e verbër, si dhe individët me status paraplegjik apo tetraplegjik.
Një ndryshim tjetër i rëndësishëm pritet të hyjë në zbatim më 1 tetor 2026 dhe ka të bëjë me kujdestarët. Deri tani, njohja e periudhës së kujdesit si vjetërsi pune (për qëllime pensioni dhe leje lindjeje) ka qenë e vlefshme vetëm për ndihmësit e personave paraplegjikë dhe tetraplegjikë. Me hyrjen në fuqi të kuadrit të ri ligjor, kjo e drejtë do t’u njihet edhe ndihmësve personalë të të gjitha kategorive.
Këto masa të reja janë ndërmarrë për të forcuar mbështetjen institucionale dhe për të lehtësuar drejtpërdrejt jetën e fëmijëve me aftësi të kufizuara si dhe të familjeve të tyre.
