Gjykata e Posaçme ka konfirmuar masat e sigurisë “arrest në burg” për Marsel Liçaj, si dhe “detyrim paraqitje” dhe “ndalim i daljes jashtë shtetit” për vëllain e tij, Ermal Liçaj, të dy të dyshuar si pjesë e një grupi të strukturuar kriminal të përfshirë në trafikun e heroinës në linjën Suedi–Danimarkë.
Sipas akuzave, të rinjtë përballen me veprat penale “Prodhim dhe shitje e narkotikëve”, në bashkëpunim në kuadër të grupit të strukturuar kriminal, si dhe “Kryerje e veprave penale nga organizata kriminale ose grup i strukturuar kriminal”.
SPAK ka njoftuar operacionin e zhvilluar së fundmi, ndërsa burime nga hetimi bëjnë me dije për Syri Televizion se goditja e këtij grupi është realizuar pas një hetimi të përbashkët mes autoriteteve shqiptare dhe atyre daneze, të cilat kanë shkëmbyer informacion në kohë reale mbi aktivitetin e të dyshuarve.
Në Shqipëri, disa persona kanë qenë nën përgjim dhe survejim, ku dyshohet se bëhej koordinimi i trafikut, ndërsa droga përgatitej në tregun danez për shpërndarje, e përzier me substanca si paracetamol dhe kafeinë, me qëllim rritjen e fitimeve.
Hetimet kanë zbuluar se transporti i heroinës kryhej me automjete që kalonin përmes “Drogden Tunnel”, që lidh Suedinë me Danimarkën, ku më pas droga shpërndahej në tregun lokal danez. Deri tani janë dokumentuar rreth 7 episode të veprimtarisë kriminale, me sasi që në disa raste varionin nga 3 deri në 4 kilogramë.
Burimet bëjnë me dije se vëllezërit Liçaj nuk kanë precedent penal në Shqipëri, por në Danimarkë dyshohet se ata dhe bashkëpunëtorët e tyre figurojnë në dosje për aktivitete të ngjashme kriminale. Hetimi ka nisur në vitin 2023 dhe ka dokumentuar aktivitetin nga 1 tetor 2023 deri më 23 janar 2024, ndërsa hetimet vijojnë për identifikimin e personave të tjerë të përfshirë në rrjet.
