Dyshohet se 37 pakot me kokainë të sekuestruara një ditë më parë në Portin e Durrësit i përkasin një grupi kriminal ku bën pjesë edhe Gert Gjinarari. Ndërsa në Durrës u zbulua lënda narkotike, në Belgjikë ndaj Gjinararit, i njohur me nofkën ‘Gjenerali’, u ngrit një tjetër akuzë si pjesë e një grupi kriminal që merrej me trafikun e drogës.
Pasi autoritetet belge zhvilluan një hetim që zgjati një vit, arritën të identifikojnë një 48-vjeçar të lidhur me Gjinararin, i cili u arrestua nga policia në Antëerp. Ky 48-vjeçar dyshohet se ka qenë ndërmjetës mes grupeve kriminale nga Shqipëria dhe Amerika Latine për importimin e kokainës nëpërmjet portit të Antverpit, si dhe ka pasur lidhje edhe me grupe kontrabande nga Evropa dhe Australia.
Po ashtu, lënda narkotike që u bllokua në portin e Durrësit kishte kaluar përmes disa porteve të ndryshme dhe ishte ndërruar nga një anije në tjetrën përpara se të mbërrinte në Shqipëri.
Gert Gjinarari, i cili është në kërkim nga autoritetet shqiptare për vrasje dhe është dënuar me burgim të përjetshëm, u arrestua në qershor në Belgjikë. Lidhur me operacionin e fundit të drogës, ndaj tij dhe disa personave të tjerë është lëshuar masë arresti.