Gjykata e Lartë ka prishur vendimin e shkallës së dytë të gjyqësorit të datës 26 tetor të vitit 2022, që vendosi pafajësi për Ergys Kolaverin, duke urdhëruar rihapjen e dosjes në Apel, por me tjetër trupë gjykuese.
Vendimi u mor këtë të martë nga treshja penale Ilir Panda, Sander Simoni dhe Valbon Çekrezi.
Ergys Kolaveri u dënua nga Gjykata e shkallës së parë me 20 vite burg për veprat penale “Vrasje për gjakmarrje” mbetur në tentativë, “Mbajtja pa leje dhe prodhim i armëve, shpërthyese dhe municionit”, “Plagosja e rëndë me dashje”, por u shpall i pafajshëm në Apel.
Më datë 30.07.2016, në mjediset e ajrimit të Institucionit të Ekzekutimit të Dënimeve Penale (IEDP), Vaqarr, në orën 16:31, u plagos me armë zjarri shtetasi me iniciale Lili Dulaj, i cili gjatë hetimeve ka rezultuar të ishte objektiv i gabuar i sulmit. Nën akuzë për këtë ngjarje u mor Ergys Kolaveri për motive gjakmarrje kundër shtetasit Gazmir Daci.
Ky i fundit mbahej në qeli për vrasjen e Valmir Kolaverit dhe plagosjen e Robert Kolaverit, çka solli dhe përplasjen e ashpër mes dy fiseve Daci-Kolaveri.
Ergys Kolaveri fitoi lirinë më 16 janar të vitit 2020, pasi gjyqtarët konstatuan humbjen e fuqisë së masës së sigurisë caktuar ndaj tij. Tashmë çështja do rihapet në Apel.