Pesë mjete të tonazhit të rëndë janë shkatërruar nga flakët në një gurore në fshatin Shpërdhet të Kurbinit, në një ngjarje të ndodhur gjatë orëve të para të mëngjesit.
Sipas informacioneve paraprake, rreth orës 02:30, administratori i gurores, shtetasi me inicialet B. A., ka njoftuar policinë se në ambientet e subjektit kishte rënë zjarr, i cili ka përfshirë dhe djegur pesë mjete pune, duke shkaktuar dëme të mëdha materiale.
Hetimet e deritanishme kanë ngritur dyshime se zjarri mund të jetë shkaktuar me qëllim nga persona ende të paidentifikuar.
Grupi hetimor, në bashkëpunim me Prokurorinë, ka nisur veprimet për të sqaruar rrethanat e ngjarjes, për të identifikuar autorët e mundshëm dhe për të dokumentuar ligjërisht rastin.
