“Paketa e Maleve” në zonën e Thethit ka sjellë debate të forta në mbledhjen e radhës të Këshillit Bashkiak të Shkodrës, ku këshilltarët e opozitës kanë ngritur kritika ndaj nismës.
Sipas tyre, kjo paketë prek 100% zona të mbrojtura dhe mund të sjellë konflikte të reja juridike në Theth, duke e cilësuar gjithashtu si një nismë antikushtetuese.
Opozita pretendon se qëllimi i kësaj pakete është shtetëzimi i tokave dhe më pas dhënia e tyre personave me interesa të lidhura me bashkinë.
Gjatë diskutimeve në këshill, përfaqësues të opozitës shprehën shqetësime për mënyrën e zbatimit të projektit dhe ndikimin që mund të ketë në pronësinë private dhe zhvillimin e zonës turistike të Thethit.
Vlen të rikujtohet se rreth 10 muaj më parë, qeveria ndërmori një aksion në zonën e Thethit, ku u prishën dhjetëra objekte në kulmin e sezonit turistik, duke sjellë reagime të shumta nga banorët dhe operatorët turistikë.
