Një incident i pazakontë është regjistruar këtë të hënë, në lagjen nr 4, të qytetit të Durrësit.
Sipas raportimeve në media, disa copa të mëdha betoni kanë rënë nga fasada e një pallati dhe si pasojë, është dëmtuar një automjet që ndodhej i parkuar pranë godinës, ndërsa më pas mjeti është larguar nga vendi i ngjarjes.
Në zonë kanë mbërritur punonjës të zjarrfikëses dhe efektivë të policisë, të cilët kanë rrethuar perimetrin për të shmangur rrezikun për qytetarët dhe automjetet e tjera që kalojnë aty pranë.
Sipas informacioneve paraprake, shkak i rënies së suvasë dyshohet të ketë qenë amortizimi i fasadës, sidomos në katin e fundit të godinës.
Autoritetet pritet të kryejnë verifikimet për gjendjen e fasadës së pallatit, me qëllim parandalimin e rasteve të tjera të ngjashme.
