Një gjyqtar i Gjykatës së Lartë të Brazilit ka dhënë miratimin për Policinë Federale që të nisë një hetim ndaj Fabio Luis Lula da Silva, djalit të presidentit Luiz Inácio Lula da Silva, për dyshimet se ka shfrytëzuar ndikimin e tij në ndihmë të një lobisti në marrëdhënie me Ministrinë e Shëndetësisë.
Javën e kaluar, mediat e huaja raportuan se policia kishte kërkuar autorizim për të filluar hetime ndaj Fabio Luis, i njohur ndryshe si Lulinha, me dyshimet për trafik ndikimi dhe korrupsion në favor të biznesmenit Antonio Carlos Camilo Antunes.
Sipas hetuesve, Lulinha dyshohet se ka ndërmjetësuar për t’u siguruar kompanive të lidhura me Antunes qasje te zyrtarë të Ministrisë së Shëndetësisë, lidhur me një kontratë qeveritare për furnizimin e një ilaçi të bazuar në kanabidiol (CBD).
