Gjendja e bazamentit dhe e dërrasave në Urën e vjetër të Bunës në Shkodër vijon të jetë problematike, ndërsa hapësirat e dëmtuara përbëjnë rrezik për qytetarët që e përdorin urën në këmbë apo me biçikletë.
Më 9 shtator, kryebashkiaku Benet Beci njoftoi për ndërhyrje në urë, por vetëm 12 ditë më vonë, në 21 shtator, në disa pjesë të saj shihen sërish dërrasa të thyera dhe gropa të hapura.
Një situatë që ngre pikëpyetje për mënyrën dhe cilësinë e ndërhyrjeve në këtë segment, ku kalojnë çdo ditë qytetarë dhe turistë.
Në vend të një zgjidhjeje afatgjatë, ura duket se po përballet sërish me të njëjtin problem, pak ditë pas punimeve të njoftuara.
