“Deti Adriatik është vendi për këto aventura, jo Liqeni i Shkodrës.” Me këtë deklaratë të fortë, biologia Aurora Piroviq ka reaguar ndaj përdorimit të mjeteve motorike në zonën e mbrojtur të Liqenit të Shkodrës, duke paralajmëruar për dëmet që sipas saj i shkaktohen faunës dhe habitateve natyrore.
Në reagimin e saj publik, Piroviq thekson se Liqeni i Shkodrës është “Rezervat Natyror i Mbrojtur” dhe zonë Ramsar me rëndësi ndërkombëtare, ndaj ligji ndalon çdo aktivitet që sjell shqetësim apo dëmtim për faunën e egër.
Sipas biologes, në zonat sensitive të liqenit, si ajo e zambakëve, nuk lejohen mjete motorike me ndikim të lartë si skafet apo jet ski-t, pasi ato shkaktojnë ndotje akustike, ndotje të ujit dhe prishje të habitatit natyror.
Reagimi i plotë:
“Zoti kryetar, liqeni i Shkodrës nuk është për aventura të tilla në një zonë të mbrojtur
Liqeni i Shkodrës si zonë e mbrojtur Rezervat Natyror i Mbrojtur (kategoria e IV) dhe ligatinë e rëndësishme me interes ndërkombëtar, zonë Ramsar ( konventa ndërkombëtare) zonë e rëndësishme për zogjtë (IBA ), e ka të shkruar në ligjin e zonave të mbrojtura nr 81/2017 i ndryshuar me ligjin nr 21/2024 , neni 26 që nuk lejohen apo ndalohen veprimtari që sjellin dëmtime, shqetësime për faunën e egër.
Plani i zonimit të ZM të RNM liqeni i Shkodrës e ndan rezervatin në nënzona:
Në nënzonën qendrore ruhet “zona natyrore e pashqetësuar” për biodiversitetin (siç është zona e zambakëve) dhe nuk lejohen aktivitete me ndikim të lartë, përfshirë dhe mjetet motorike si skaf apo jet ski që shqetësojnë habitatin apo faunën e egër.
Në nënzonat rekreative dhe të zhvillimit të qëndrueshëm mund të lejohet qarkullimi i kufizuar në koridore të përcaktuara dhe në përputhje me planin e menaxhimit dhe autorizimin e AKZM-së.
Pra përdorimi i mjeteve motorike me shpejtësi dhe fuqi të lartë (skaf apo jet ski) NUK lejohet lëvizja e tyre në zonat strikte apo habitate sensitive dhe ligatinore ku janë habitate të rëndësishme si vendfolezimet apo vendriprodhimi të faunës ujore.
Çdo mjet motorik nuk konsiderohet mjet ekologjik i cili shkakton ndotje akustike dhe ndotje të ujit aq më tepër shkakton dëmtim të habitatit dhe shqetësim për faunën e egër!
Deti Adriatik është vendi për këto aventura.
