Bill Gates ka risjellë në vëmendje debatin për të ardhmen e punës në një epokë të dominuar nga inteligjenca artificiale, duke evidentuar katër profesione që sipas tij do të jenë më të mbrojtura nga ndikimi i AI-së.

Ndërkohë, Microsoft – kompania që Gates e ka bashkëthemeluar – po implementon një skemë largimi vullnetar, me potencialin për të përfshirë deri në 60,000 të punësuar. Ky zhvillim reflekton qartë mënyrën se si kompanitë lider të teknologjisë po ripërshtasin strukturat e tyre të burimeve njerëzore përballë sfidave të reja.

Duke qenë i ftuar në “The Tonight Show Starring Jimmy Fallon”, Gates theksoi se efekti i inteligjencës artificiale do të ndjehet pothuajse në të gjitha aspektet e aktivitetit njerëzor.

Sipas Gates, katër profilet që qëndrojnë më të sigurta janë:

Programuesit: Krijimi dhe dizenjimi i kodit vazhdon të mbetet një fushë që kërkon logjikë dhe kontroll të vazhdueshëm nga ana e njeriut.

Biologët: Zbulimet shkencore dhe kuptueshmëria mbi jetën e organizmave ende kërkojnë ekspertizë të specializuar.

Punonjësit në sektorin e energjisë: Menaxhimi si dhe tranzicioni drejt teknologjive të reja kërkojnë punë në terren dhe vendimmarrje të ndërlikuara.

Sportistët: Gates, në mënyrë humoristike, nënvizoi se “askush nuk do të dëshironte të shihte kompjuterët duke luajtur bejsboll”.

Edhe pse këto profesione shfaqin një lloj imunizimi ndaj AI-së, Gates theksoi se pjesa më e madhe e detyrave të zakonshme do të mund të kryhen pa ndërhyrjen e drejtpërdrejtë të njeriut, duke nënvizuar transformimin e thellë që po kalon tregu botëror.

Ndërsa Gates trajton çështjet e së ardhmes së punës, Microsoft ka shpallur programin e Ofertës për Largim Vullnetar, që mbulon punonjës të kualifikuar në SHBA, Kanada, Indi dhe Mbretërinë e Bashkuar.

Programi është i vlefshëm për personelin deri në shkallën 70, duke përjashtuar departamentet e shitjeve dhe disa ekipe kyçe inxhinierike. Sipas mediave ndërkombëtare, kjo iniciativë mund të ndikojë deri në 60,000 punonjës, shifër që përbën rreth 27% të totalit të stafit të Microsoft-it.

“Në një deklaratë, Amy Coleman, Zëvendëspresidentja Ekzekutive dhe Drejtoresha e Personelit e Microsoft, e përshkroi iniciativën si një mundësi daljeje vullnetare dhe të kufizuar në kohë me mbështetje financiare dhe burime planifikimi karriere, duke ofruar fleksibilitet më të madh për punonjësit.”