Prej dy netësh, në qytetin e Shkodres po zhvillohet festa e motorëve e organizuar nga Bashkia Shkodër, një aktivitet që ka mbledhur qindra motoristë nga vende të ndryshme për të promovuar motorët e tyre dhe kulturën e këtij stili jetese.
Atmosfera është shoqëruar me muzikë rock, parada motorësh dhe xhirime gomash deri në orët e vona të natës, duke krijuar një spektakël që për shumë të rinj dhe adhurues të motorëve është kthyer në një festë adrenaline dhe argëtimi.
Megjithatë, zhurma e fortë e motorëve ka sjellë edhe reagime kritike nga qytetarë të ndryshëm te bezdisur nga zhurmat e forta, të cilët e konsiderojnë aktivitetin shqetësues për qetësinë publike. Mes tyre është edhe shkrimtari dhe intelektuali shkodran Zija Vukaj, i cili ka reaguar publikisht për ndotjen akustike në qytet.
“Një ndotje të dhunshme akustike po përjetojnë qytetarët e pafajshëm të qytetit të Shkodrës. Buçimat e llahtarshme të motoçikletave të përbindshme shumëkubikëshe, kanë zëvendësuar tingujt e butë të jetës së qytetit që prodhon vetëm muzikë. Llahtari sonte më 9 maj të këtij viti”, shkruan Vukaj.
