Shkarkimin e drejtorëve në bllok, Bardh Spahia e cilëson si një përpjekje të Edi Ramës për t’i shpëtuar përgjegjësisë për dështimin e qeverisjes. Përmes një reagimi publik, ai shprehet se largimi i vartësve nuk e zgjidh problemin e korrupsionit në administratën publike, por synon të mbrojë kreun e qeverisë.
Sipas Spahisë, Rama po përpiqet të bëjë përgjegjës drejtorët, ndërkohë që, sipas tij, vetë i ka emëruar, mbështetur dhe përdorur. Ai e krahason këtë lëvizje me ndryshimin e perdeve në një shtëpi që po digjet, duke e cilësuar nismën si një përpjekje të dështuar për të mbuluar problemet e administratës.
Përfaqësuesi i opozitës shprehet gjithashtu se Partia Socialiste nuk ka figura të pakonsumuara për t’i zëvendësuar drejtuesit e larguar dhe e akuzon qeverinë për kriminalizimin e administratës publike.
Në përfundim të reagimit të tij, Bardh Spahia kërkon dorëheqjen e menjëhershme të Edi Ramës, duke e konsideruar largimin e kryeministrit si kushtin e vetëm për ndryshimin e situatës në vend.
Reagimi i tij vjen në një kohë kur protestat kundër qeverisë vijojnë, ndërsa opozita dhe protestuesit kërkojnë përgjegjësi politike për situatën në vend.
