Një hap i ri është shënuar në përplasjen ligjore të banorëve të Rrjollit me projektin “Baks Bay”.
Avokati i banorëve, Ndue Pjetra, ka bërë të ditur se Gjykata e Posaçme Kundër Korrupsionit dhe Krimit të Organizuar ka pranuar ankimin e tyre ndaj vendimit të SPAK për mosfillimin e hetimeve mbi kallëzimin penal të depozituar nga banorët.
Sipas përfaqësuesit të tyre ligjor, gjyqtarja Flojera Davidhi ka urdhëruar Prokurorinë e Posaçme të regjistrojë procedimin penal dhe të nisë hetimet për pretendimet e paraqitura në kallëzim.
Vendimi vjen pas kundërshtimit të banorëve ndaj qëndrimit fillestar të SPAK, duke e rikthyer çështjen në fazën e hetimit.
Avokati Ndue Pjetra e ka cilësuar vendimin si një zhvillim të rëndësishëm për banorët, duke deklaruar: “Banorët fituan. Nis drejtësia.”
