Edicioni i pestë i “Art House School” ka nisur në Shkodër, duke mbledhur artistë, krijues dhe profesionistë të artit bashkëkohor në një program që synon shkëmbimin e ideve dhe eksperiencave.
I ftuari i parë i këtij edicioni ishte artisti Genti Korini, i cili u ndal te puna dhe krijimtaria e tij, duke ndarë me pjesëmarrësit eksperiencën e krijimit artistik.
Gjatë takimit në Shkodër, Korini prezantoi edhe disa prej punëve të tij në format video, të cilat do të udhëtojnë drejt Venecias për t’u bërë pjesë e prezantimit të Shqipërisë në kuadër të Bienales së Venecias.
Për artistin, pjesëmarrja në një prej ngjarjeve më të rëndësishme të artit bashkëkohor në skenën ndërkombëtare përbën një mundësi të rëndësishme për të promovuar krijimtarinë shqiptare përtej kufijve.
Përgjatë ditëve në vijim, “Art House School” do të vijojë me takime, diskutime dhe aktivitete të ndryshme, duke krijuar një hapësirë ku artistët e rinj mund të ndërveprojnë me emra dhe profesionistë të artit bashkëkohor.
Programi i këtij viti në Shkodër do të vijojë deri më 16 shtator.
