Portieri shkodran Alen Sherri ka regjistruar fitoren e tij të parë me kombëtaren shqiptare si titullar, në triumfin 3-0 të kuqezinjve ndaj San Marinos në Ligën e Kombeve.
Gardiani, i cili e nisi ndeshjen nga minuta e parë, u tregua vendimtar në disa momente me pritjet e tij, duke ndihmuar Shqipërinë të ruante portën të paprekur. Paraqitja e tij ishte një tjetër tregues i gatishmërisë për të konkurruar për një vend në formacion edhe në përballje më të vështira.
I formuar te Vllaznia dhe me një eksperiencë të rëndësishme te Egnatia, Sherri aktivizohet aktualisht në Itali, ku është pjesë e Cagliarit.
Për 28-vjeçarin, kjo ishte ndeshja e tretë me fanellën kuqezi, por e para si titullar në një kompeticion zyrtar. Debutimin me Shqipërinë e kishte bërë në vitin 2022, si zëvendësues në miqësoren ndaj Katarit, të humbur 1-0. Ndërsa në qershor të këtij viti, ai u aktivizua edhe në miqësoren kundër Izraelit, ku Shqipëria u mposht me të njëjtin rezultat.
Përballë San Marinos, Sherri arriti të shijojë fitoren e parë me kombëtaren, duke kontribuar në suksesin e ekipit dhe duke lënë përshtypje pozitive mes kuadrateve.
Paraqitja e tij përbën një moment të rëndësishëm në karrierën ndërkombëtare të portierit shkodran, i cili synon të fitojë më shumë hapësira në të ardhmen, si me fanellën e Shqipërisë, ashtu edhe në aventurën e t
ij italiane.
