Pas ndërhyrjeve në bregdetin e Shëngjinit, autoritetet kanë vijuar aksionin edhe në plazhin e Tales, në Bashkinë Lezhë, me synim lirimin e hapësirave publike të zëna në mënyrë të paligjshme.
Gjatë kontrolleve të kryera nga Policia Bashkiake dhe strukturat përgjegjëse, u evidentuan tre subjekte që ushtronin aktivitet pa dokumentacionin e nevojshëm dhe kishin vendosur çadra e shezlongë në hapësira publike pa leje.
Si pasojë, u konfiskuan dhjetëra çadra dhe shezlongë, ndërsa ndaj dy prej subjekteve u morën masa administrative me gjobë për shkeljet e konstatuara.
Kryeinspektori i Policisë Bashkiake Lezhë, Leonard Palaj, bëri të ditur se kontrollet do të vijojnë gjatë gjithë sezonit turistik dhe se nuk do të tolerohet asnjë rast i zaptimit të paligjshëm të plazheve apo ushtrimi i aktivitetit në kundërshtim me ligjin.
Sipas Bashkisë Lezhë, aksioni do të shtrihet në të gjithë vijën bregdetare, nga Rana e Hedhun deri në Kune, me synim garantimin e aksesit të lirë të pushuesve në plazhet publike dhe respektimin e rregullave nga të gjitha subjektet që operojnë gjatë sezonit veror.
