Shqiptarët janë populli që shpenzon më pak për të siguruar jetën, makinën apo pronën në krahasim me të gjithë popujt e tjerë të Evropës Qendrore dhe Lindore. Të dhënat nga raporti më i fundit i Xprimm tregojnë se një shqiptar paguan mesatarisht 104 euro në vit për sigurime.
Kosova renditet më lart se Shqipëria me 108 euro shpenzime për sigurime, Maqedonia e Veriut me 161 euro për frymë, Bosnja dhe Hercegovina 174 euro, Mali i Zi rreth 234 euro, ndërsa për Serbinë nuk ka të dhëna. Prej vitesh me radhë tashmë, shqiptarët mbeten shumë pak të ndërgjegjësuar mbi rëndësinë e sigurimit, e për rrjedhojë të pambrojtur financiarisht nëse një fatkeqësi ndodh në jetën e tyre.
As ngjarje të rënda si tërmeti i vitit 2019 që solli humbje të jetëve të njerëzve dhe dëme të konsiderueshme materiale, nuk sollën reflektim, që nënkupton se ne jemi një popull që harrojmë shpejt dhe vazhdojmë t’i shtrijmë dorën shtetit, të afërmve apo donatorëve të ndryshëm kur përballemi me një fatkeqësi.
Ne sigurohemi vetëm kur jemi të detyruar ta bëjmë, siç ndodh me sigurimin e detyrueshëm të automjeteve, ndërsa sigurimet e tjera vullnetare konceptohen më tepër si “barrë financiare”. Ndikim te kjo mund të kenë edhe të ardhurat e pamjaftueshme për shumë familje shqiptare.
Megjithatë, pavarësisht se kultura e sigurimit në Shqipëri është më e prapambetura në rajon, vendi rezulton të jetë përmirësuar në krahasim me veten nga viti në vit. Kështu nga 92 euro që ishte shpenzimi mesatar i një shqiptari në 2024, në 2025 arriti në 104 euro.
Po për sa i përket shkallës së penetrimit të sigurimeve në ekonomi?
Edhe këtu tregu i sigurimeve zë një pjesë shumë të vogël në ekonomi. Sigurimet përbëjnë vetëm 1% të ekonomisë shqiptare, më pak se në çdo vend tjetër të rajonit. Kosova renditet sërish më lart me 1.6%, Maqedonia e Veriut thuajse 1.8%, Mali i Zi po ashtu, ndërsa Bosnje dhe Hercegovina me 2.2%.
