Një rrëshqitje masive dherash ka bllokuar segmentin rrugor Shosh–Kir, duke sjellë vështirësi në qarkullimin e mjeteve dhe duke e bërë përkohësisht të pakalueshme këtë aks.
Menjëherë pas krijimit të situatës, firma kontraktuese ka ndërhyrë në terren me mjete dhe punonjës për pastrimin e inerteve dhe hapjen e rrugës. Punimet po vijojnë me intensitet, me synim rikthimin sa më të shpejtë të qarkullimit normal në këtë zonë.
Procesi i ndërhyrjes po monitorohet edhe nga administratori i Njësisë Administrative Shosh, Miri Çezma, i cili është angazhuar për koordinimin e situatës në terren dhe lehtësimin e punës së ekipeve.
Autoritetet synojnë që aksi të zhbllokohet në kohën më të shpejtë të mundshme, duke rikthyer aksesin normal për banorët dhe automjetet që lëvizin në këtë segment malor.
