Vllaznia e femrave hedh hapin e parë drejt finales

Vllaznia e femrave ka hedhur një hap të rëndësishëm drejt finales së kampionatit, pasi ka triumfuar minimalisht me rezultatin 1-0 ndaj Gramshit në ndeshjen e parë gjysmëfinale të fazës “Final 4”, të zhvilluar në Arbanë. Një fitore e vyer për skuadrën shkodrane, që konfirmon eksperiencën dhe forcën e saj në momentet vendimtare të sezonit. Pjesa e parë u karakterizua nga raste për të dyja ekipet, por pa konkretizim, duke bërë që skuadrat të shkojnë në pushim me rrjeta të paprekura. Në fraksionin e dytë, ndërhyrja e stafit teknik dhe trajnerit Nikolin Leka rezultoi vendimtare, pasi aktivizimi i Klaudia Boriçit solli ndryshimin në lojë. Ishte pikërisht ajo që në minutën e 60-të zhbllokoi sfidën, duke shënuar golin e vetëm të takimit në portën e mbrojtur nga Hyska. Pas golit, Vllaznia pati mundësi për të dyfishuar rezultatin, por pa sukses në finalizim, duke bërë që gjithçka të mbyllet me shifrat 1-0. Ky avantazh e vendos ekipin e drejtuar nga Nikolin Leka në një pozicion të favorshëm për ndeshjen e kthimit. Takimi i dytë gjysmëfinal do të luhet më 23 maj në Shkodër, ku kuqeblutë synojnë të vulosin kualifikimin. Sipas rregullores, në rast barazimi pas dy ndeshjeve, kalon në finale skuadra e renditur më mirë në kampionat. Finalja e madhe është planifikuar më 29 maj, ora 17:00, në “Shtëpinë e Futbollit”. Objektivi i Vllaznisë mbetet i qartë: fitimi i titullit të 13-të kampion, me vetëm dy hapa larg realizimit të këtij synimi.