Në të gjithë vendin, vijon Programi Kombëtar i Zhvillimit Profesional për mësuesit për periudhën 2026–2028, një nismë që synon rritjen e cilësisë së mësimdhënies dhe përshtatjen e saj me zhvillimet bashkëkohore.
Çdo fundjavë auditorët e universiteteve në vend po shndërrohen në qendra aktive të shkëmbimit të dijeve dhe inovacionit, ku mësuesit ndjekin me përkushtim sesionet trajnuese.
Kryeminstri Edi Rama, në një postim në rrjetet sociale deklaroi se “Programi Kombëtar i Zhvillimit Profesional të Mësuesve 2026–2028, i cili po realizohet në partneritet me 9 universitete në të gjithë vendin, po trajnon mësuesit për metodologjinë mbi kurrikulat e reja mësimore dhe përshtatjen me teknologjinë e informacionit dhe inteligjencën artificiale në mësimdhënie”.
“Ky bashkëpunim ndërmjet institucioneve të arsimit të lartë dhe institucioneve arsimore mbetet një element kyç për forcimin e cilësisë së mësimdhënies dhe mbështetjen e mësuesve në rrugëtimin e tyre profesional”, tha Rama.
Ky program synon të pajisë mësuesit me metoda të reja pedagogjike, duke nxitur përdorimin e teknologjisë në procesin mësimor dhe duke rritur ndërveprimin me nxënësit.
Trajnimet përfshijnë module të avancuara që lidhen me inovacionin në arsim, zhvillimin e aftësive digjitale dhe përmirësimin e praktikave të mësimdhënies, duke kontribuar në një sistem arsimor më cilësor dhe më të përshtatur me kërkesat e kohës.
