Çmimet e fruta-perimeve në tregjet e Shkodrës po bëhen gjithnjë e më të papërballueshme për shumë qytetarë. E njëjta situatë vihet re edhe në tregun e Zdrales, ku më të goditurit nga rritja e çmimeve janë pensionistët.
Ata shprehen se kostoja e jetesës është rënduar ndjeshëm dhe se po e kanë gjithnjë e më të vështirë të përballojnë shpenzimet e përditshme. Qytetarët kërkojnë ndërhyrje dhe masa konkrete nga qeveria për të frenuar rritjen e çmimeve. Nuk mungojnë as kritikat ndaj kryeministrit, për të cilin disa prej tyre thonë se nuk po i sheh problemet reale të popullit.
Rritja e çmimeve dhe vështirësitë ekonomike duket se kanë sjellë edhe ulje të fuqisë blerëse, pasi qytetarët po blejnë më pak se më parë në tregje.
