Benet Beci po bën përpëlitjet e fundit për të rikandiduar për Bashkinë e Shkodrës, edhe pse shanset për ta bërë këtë thuajse janë zeruar.
Dje bëri përpjekjen e radhës duke pritur në zyrë një prej armiqve të tij, presidentin e Vllaznisë, Alban Xhaferi, i cili shoqërohej nga trajneri Csaba László dhe kapiteni Bekim Balaj.
Takimi i 17 nëntorit u prezantua si një bashkëbisedim për objektivat e skuadrës dhe vijimin e bashkëpunimit mes klubit dhe bashkisë. Beci premtoi mbështetje për përmirësimin e stadiumit “Loro Boriçi”, ndërsa klubi e shoqëroi reagimin me mesazhin: “Së bashku jemi më të fortë!”.
Por kjo foto e buzëqeshjeve dhe bashkëpunimit vjen pas një historie krejt tjetër.
Në qershor të vitit 2025, marrëdhëniet mes Bashkisë Shkodër dhe drejtuesve të Vllaznisë ishin në një pikë të tensionuar. Shkak u bë organizimi i një koncerti në stadiumin “Loro Boriçi”, kundër të cilit doli klubi, duke pretenduar se po cenohej destinacioni sportiv i impiantit. Përplasja u shoqërua me akuza publike, debate dhe ironi nga vetë Alban Xhaferi ndaj kryebashkiakut.
Vazhdimisht keto dy figura kanë patur përplasje publike, por mesa duket distanca mes dy palëve u shkri në pak ditë, sepse Beci ka nevojë për mbështetje, dhe duke ditur peshën që futbolli ka në Shkodër, Alban Xhaferi mund t’i bëjë punë.
Beci e di fare mirë që Vllaznia nuk është thjesht një ekip futbolli. Ajo është identitet, krenari dhe një ndër faktorët që bashkon mijëra qytetarë. Mbështetja e saj dhe afrimi me drejtuesit e klubit mund të përkthehen edhe në kapital elektoral.
Ndaj ai po përpiqet të fitojë zemrat e tifozëve përmes afrimit me drejtuesit e kuqebluve, të cilët lanë mënjanë dinjitetin dhe nxituan të ulen në foto pranë Kryetarit të Bashkisë.
Por ndërsa kryebashkiaku shfaqet i buzëqeshur në tryezën e bashkëpunimit me Vllazninë, halli i madh është gjetkë, tek vendimi i Gjykatës së Posaçme.
SPAK ka kërkuar burg dhe 5 vite ndalim të funksioneve publike dhe kjo e ka lënë pa gjumë Becin.
Prokuroria kërkon jo vetëm një dënim penal, por edhe ndalimin e ushtrimit të funksioneve publike për pesë vite.
Me një kërkesë të tillë të SPAK-ut mbi tryezë, a ka Benet Beci kredibilitetin dhe përgjegjësinë morale për të kërkuar sërish besimin e qytetarëve?
Si mund të flitet për drejtimin e qytetit dhe të ardhmen e tij, kur vetë drejtuesi i bashkisë përballet me një kërkesë të prokurorisë për burg dhe përjashtim pesëvjeçar nga funksionet publike?
Në Shkodër, ndërkohë, fotografia e re e pajtimit me Vllazninë është bërë. Në të vërtetë ajo është një urë drejt votave të tifozëve, të cilët e dinë mirë se ai që buzëqesh me presidentin e Vllaznisë, është një hajdut që nuk do të ketë mundësi të rikandidojë më.
