Universiteti i Shkodrës “Luigj Gurakuqi” ka hedhur një tjetër hap të rëndësishëm drejt ndërkombëtarizimit dhe forcimit të bashkëpunimit akademik ndërkombëtar.
Rektori i universitetit, Prof. Dr. Tonin Gjuraj, priti në një takim zyrtar një ekip nga Universiteti i Hamburgut, të kryesuar nga Prof. Dr. Stefan Voigt, në kuadër të nënshkrimit të marrëveshjes së bashkëpunimit mes dy institucioneve akademike.
Marrëveshja synon zhvillimin e kërkimit shkencor të përbashkët, veçanërisht në fushën e Ekonomisë Eksperimentale, si dhe shkëmbimin e materialeve akademike dhe publikimeve shkencore. Po ashtu, bashkëpunimi do të fokusohet në forcimin e dimensionit ndërkombëtar në mësimdhënie dhe kërkim shkencor, duke krijuar mundësi të reja për studentët dhe stafin akademik të të dy universiteteve.
Përfaqësuesit e dy universiteteve e vlerësuan këtë marrëveshje si një moment të rëndësishëm për zgjerimin e partneriteteve ndërkombëtare dhe rritjen e cilësisë në arsimin e lartë dhe kërkimin shkencor.
