Qeveria sllovene është duke punuar për të ndryshuar Ligjin për Mbrojtjen e Rendit dhe Qetësisë Publike, me një propozim që synon ndalimin e mbulimit të fytyrës në hapësira publike në mënyrë që të mundësohet identifikimi i qartë i tipareve të fytyrës. Ky ndryshim mendohet të lehtësojë punën e policisë në identifikimin e personave.

Sipas draftit, ky ndalim nuk do të vlejë për disa lloj veshjesh, simbole fetare apo situata të caktuara personale. Përjashtime parashikohen kur mbulimi i fytyrës kërkohet për arsye profesionale apo shëndetësore, si dhe gjatë aktiviteteve sportive, ngjarjeve kulturore, artistike ose tradicionale, njofton STA.

Shkelësit e këtyre rregullave do të përballen me gjoba nga 100 deri në 200 euro.

Punimi mbi këto ndryshime ligjore nisi pasi partia e koalicionit “Istina” (Resni.ca) propozoi organizimin e një referendumi ku qytetarët të shprehnin qëndrimin e tyre nëse mbulimi i fytyrës duhet të ndalohet në hapësirat publike.

Edhe pse nisma për referendum kërkon ndalim të përgjithshëm të mbulesave të fytyrës, gjatë debatit përfaqësues nga grupet parlamentare theksuan se diskutimi lidhet kryesisht me burkat dhe theksuan rëndësinë e vendosjes së kufizimeve. Sipas tyre, në të kundërt, sllovenët mund të jenë në pozita të pafavorshme përballë emigrantëve.

Ata shprehën gjithashtu bindjen se emigrantët duhet të përshtaten me mënyrën e jetesës në Slloveni.

Ndërkohë, në shtatë vende evropiane – Belgjikë, Francë, Bullgari, Austri, Danimarkë, Zvicër dhe Portugali – ndalimi i mbulimit të plotë të fytyrës tashmë është në fuqi. Holanda, Luksemburgu dhe Letonia kanë miratuar ndalime të pjesshme, që prekin veçanërisht institucionet shtetërore, arsimore ose shëndetësore. Në Gjermani dhe Itali, disa provinca kanë ndërmarrë masa të ngjashme për ndalimin e mbulimit të fytyrës.